Obama og umhverfið hjá Græna netinu

Nýr forseti á leið í Hvíta húsið með fangið fullt af fyrirheitum í umhverfis-, orku- og efnahagsmálum og hefur sett úrvalsfólk til verka. – Hver er stefnan? Hvað verður úr? Hvaða áhrif hafa breytingarnar vestra á heimsbyggðina – og Ísland? Árni Finnsson og Karl Blöndal málshefjendur á fundi Græna netsins um Obama og umhverfið á Glætunni á laugardaginn frá kl. 11.

Græna netið heldur fund um Barack Obama og umhverfismálin laugardaginn 10. janúar á kaffihúsinu Glætunni, Laugavegi 19 (gegnt Máli og menningu). Málshefjendur eru Árni Finnsson, formaður Náttúruverndarsamtaka Íslands, og Karl Blöndal, aðstoðarritstjóri Morgunblaðsins. Fundurinn hefst kl. 11 árdegis.
Kjörinn Bandaríkjaforseti vakti mikla athygli í kosningabaráttunni fyrir einarða afstöðu í umhverfismálum, sama hvort borið er niður í baráttu gegn loftslagsvá, í orkumálum eða almennri náttúruvernd. Fréttir af mannaskipan og öðrum undirbúningi valdatökunnar benda til þess að Obama hafi fullan hug á að standa við fyrirheit sín í þessum efnum. Þar verður þó við ramman reip að draga – stórfyrirtæki, íhald og ýmis hagsmunaöfl innan þings og utan. 

Á fundinum á laugardag tala tveir kunnáttumenn um umhverfismál og bandarísk stjórnmál um stefnumið Obama og líkur á því að hann komi þeim í framkvæmd. Einnig má vænta umræðna um áhrif breyttrar stefnu vestra á íslensk stjórnmál – þar sem umhverfisstefna Sjálfstæðisflokksins hefur ekki síst mótast af nánum kynnum við kenningasmiði repúblikana í Bandaríkjunum.

Allir velkomnir á fund GN í Glætunni.

Stjórnin

 

Hvað getum við lært af Finnum?

Græna netið efnir til spjallfundar um hvað Íslendingar geti lært af Finnum á Glætunni, Laugavegi 19, kl. 11.00 nk. laugardag, 8. nóvember. Málshefjandi á fundinum er Jón Baldvin Hannibalsson, áður utanríkisráðherra og sendiherra Íslands í Finnlandi. Á fundinum fjallar Jón Baldvin um ástæður þess að Finnar lentu í svo alvarlegum efnahagsþrengingum og lýsir því hvað þeir gerðu til að vinna sig út úr þeim. Ennfremur veltir hann fyrir sér hvaða lærdóm megi draga af reynslu Finna, - hvaða mistök þeir gerðu og hvað þeir gerðu vel.

"Finnska leiðin" svokallaða hefur verið til umræðu á pólitískum fundum og í fjölmiðlum á undanförnum vikum. Sitt sýnist hverjum en ljóst er að Íslendingar geta dregið lærdóm af reynslu Finna. Fróðlegt verður að heyra hvaða Jón hefur um málið að segja. Stjórn Græna netsins hvetur áhugasama til að mæta og taka þátt í líflegum umræðum um málefni dagsins.
 
Allir velkomnir!

Stjórn Græna netsins

Umhverfið og kreppan – fórnir eða lausnir?

Umhverfisráðherra einn málshefjenda á opnum spjallfundi um kreppuna og umhverfismálin á laugardaginn 

 

Þórunn Sveinbjarnardóttir umhverfisráðherra, Árni Finnsson formaður Náttúruverndarsamtaka Íslands og Dofri Hermannsson varaborgarfulltrúi eru málshefjendur á spjallfundi Græna netsins um umhverfismál á krepputímum á laugardaginn kemur, 11. október. Fundurinn er haldinn á Kaffi Hljómalind á Laugavegi 23 í Reykjavík, og hefst kl. 11 árdegis. Í yfirlýsingum ráðamanna og álitsgjafa þessa kreppudaga hefur nokkuð borið á því að nú verði að hætta þessari umhverfisvitleysu. Umhverfismál eru lúxus sem við getum ekki leyft okkur, sagði forystumaður atvinnurekenda, og kunnur viðskiptablaðamaður lagði til að lög um umhverfismat yrðu afnumin til að auðvelda framkvæmdir og nýjan vöxt.  

Umhverfismál í kreppu? – er umræðuefnið á spjallfundi Græna netsins. Verður tillit til umhverfisins að víkja meðan við vinnum okkur út úr vandanum, með rússneskum olíuhreinsistöðvum og allskyns álverum? Eða á kannski þvert á móti að byrja upp á nýtt með öðruvísi hagkerfi og önnur lífsgildi? Málshefjendur eru Þórunn Sveinbjarnardóttir umhverfisráðherra, Árni Finnsson formaður Náttúruverndarsamtaka Íslands og Dofri Hermannsson varaborgarfulltrúi en fundarstjóri er Mörður Árnason íslenskufræðingur og varaþingmaður.

Allir velkomnir einsog venjulega – mætið á fróðlegan fund um málefni dagsins og takið með ykkur gesti.  Stjórnin

--
Græna netið, félag jafnaðarmanna um umhverfið, náttúruna og framtíðina
[e-mail]

www.graenanetid.blog.is

Græna netið ályktar um landsskipulag

Græna netið fundaði um landsskipulag á Kaffi Hljómalind í morgun. Lýstu fundarmenn áhyggjum sínum yfir því að lögin skuli ekki hafa verið tekin til afgreiðslu á haustþingi og var samþykkt ályktun þess efnis í lok fundar. Tillaga að landsskipulagi er hluti af frumvarpi umhverfisráðherra Þórunnar Sveinbjarnardóttur að nýjum skipulagslögum sem kynnt var á síðasta þingi og er hún þriðji ráðherrann sem kemur að frumvarpinu.

Ályktun fundar Græna netsins:
 „Landsskipulag er nauðsynlegt stjórntæki fyrir almannavaldið í skipulags- og umhverfismálum. Það getur hindrað handahófsákvarðanir og deilur sem nú koma niður á náttúruverðmætum og tefja framkvæmdir. Opin og gagnsæ vinnubrögð við mótun landsskipulagsáætlana geta leitt til aukinnar sáttar í þessum efnum, agað stefnumótun og áætlanagerð og bætt lýðræði í samfélagi okkar. Slík skipan er við lýði í öllum hinu norrænu ríkjunum og víðast annarstaðar í grannlöndunum.
 
Græna netið lýsir vonbrigðum með að landsskipulag verði ekki lögbundið á þinginu sem nú er að ljúka. Þar með hefur alþingi látið ónýtt tækifæri til að stíga mikilsvert framfaraskref sem hefði breytt stöðu umhverfismála og orðið sveitarfélögunum mikill styrkur í skipulagsmálum, ekki síst á landsbyggðinni.
 
Græna netið væntir þess að landsskipulagsákvæðin verði lögð fyrir alþingi á ný í vetur og hvetur alþingismenn og sveitarstjórnarmenn til að ná áttum í þessu mikilvæga máli.“

Landsskipulagið – hverju breytir það? – verður það samþykkt?

Helgi Hjörvar og Sigurður Ásbjörnsson tala um landsskipulag á spjallfundi Græna netsins nk. laugardag.

Helgi Hjörvar formaður umhverfisnefndar alþingis og Sigurður Ásbjörnsson starfsmaður Skipulagsstofnunar verða málshefjendur á spjallfundi Græna netsins um landsskipulag á laugardaginn 6. september. Fundurinn er haldinn á Kaffi Hljómalind á Laugavegi 23 í Reykjavík, kl. 11 árdegis. 

Ákvæði um landsskipulag í skipulagslagafrumvarpi umhverfisráðherra hafa valdið ágreiningi meðal sveitarstjórnarmanna og þingmanna, og hefur komið fram veruleg andstaða við þau innan Sjálfstæðisflokksins. Náttúruverndarmenn hafa hinsvegar lagt mikla áherslu á landsskipulag sem leið til að rjúfa alveldi sveitarfélaga í skipulagsmálum og koma að almannahagsmunum. Þegar þessi auglýsing er skrifuð er enn ekki ljóst hvort málið verður afgreitt á nýhöfnu septemberþingi en það skýrist væntanlega fyrir fundinn á laugardag þar sem Helgi segir frá gangi mála á þinginu en Sigurður segir okkur frá helstu þáttum hugmynda um landsskipulag og hvernig það virkar í grannlöndum.

Ef vel liggur á stjórninni er hugsanlegt að hún leggi fyrir fundinn tillögu til ályktunar um þessi mál.Allir velkomnir á fundinn á Hljómalind. 

Stjórnin  

Umhverfissamtök fjölmenna í Teigsskóg í Þorskafirði

Fuglaverndarfélag Íslands, Landvernd, Náttúruverndarsamtök Íslands, Græna netið og heimamenn í Reykhólasveit efna til gönguferðar um Teigsskóg í Reykhólasveit í Barðastrandasýslu laugardaginn 5. júlí n.k. Lagt verður upp frá Gröf klukkan 13.00 þar sem Gunnlaugur Pétursson býður göngufólk velkomið og segir frá áformum Vegagerðarinnar um veglagningu um landnámsskóginn og umhverfisáhrifum hennar. Á áningarstöðum sýna Einar Þorleifsson frá Fuglavernd og Gunnlaugur Pétursson ferðalöngum fugla, blóm og jurtir m.a. ferlaufunginn og krossjurtina sem fundist hafa í skóginum. Ferðin endar í hlaðvarpanum á Hallsteinsnesi þar sem sagt verður frá lifnaðarháttum arnarins sem og einu gjöfulasta arnarhreiðri á landinu sem er að finna í Djúpafirði. Gönguferð um skóginn tekur um þrjár klukkustundir.

Áhugasamir eru beðnir að skrá sig í ferðina í síðasta lagi á miðvikudag 2. júlí kl. 16. Skráning í ferðina er hjá Sigrúnu í síma 866 9376 eða [e-mail]
 

Þeir sem vilja prjóna við ferðina og gista er bent á að búið er að taka frá fjögur herbergi í Djúpadal í næsta nágrenni Teigsskógar en þar er gisting með eldunaraðstöðu í gömlum bæ. Einnig heitur pottur og sundlaug. Þeir sem áhuga hafa á að skrá sig í þessi herbergi (3x2, 1x1) eru vinsamlegast beðnir að hringja þangað sem allra fyrst því - fyrstur kemur, fyrstur fær. Mikið er af gististöðum í Reykhólasveit og bendum við áhugasömum á eftirfarandi möguleika:

Djúpidalur
Gisting með eldunaraðstöðu, heitum potti og sundlaug kr. 2 500 í svefnpokaplássi og kr. 3 000 í uppbúnu rúmi.
Sími 434-7853
Hótel Bjarkalundur
www.bjarkalundur.is 
Sími 434-7762
Gistiheimilið Álftaland
www.alftaland.is´
Sími 434-7878
Miðjanes, ferðaþjónusta bænda
Sími 434-7787, 893-7787

Upplýsingar um svæðið með kortum: www.westfjords.is/index.php/services/listings/C11
Sjá einnig: www.gisting.is/?gid=274

Við hvetjum fólk til að sameinast um bifreiðarnar.

Tildrög ferðarinnar:
Um nokkurt skeið hafa verið í gangi málaferli sem fara fyrir Hæstarétt á hausti komandi. Málaferlin eru rekin af landeigendum, Fuglavernd og Náttúruverndarsamtökum Íslands til að hrindra ákvörðun um vegagerð yfir Djúpafjörð, Gufufjörð og um Teigsskóg.

Fuglavernd og Landvernd hafa lagt til vegagerð sem fæli í sér jarðgöng undir Hjallaháls og Gufudalsháls. Sú vegagerð kæmi að mestu í veg fyrir náttúruspjöll, Teigsskógur yrði ósnortinn og Djúpifjörður og Gufufjörður, sem eru í Breiðafjarðarfriðlandi, héldust óbreyttir. Jarðgangaleiðin myndi stytta leiðina um sem nemur 7 km og auka umferðaröryggi verulega - enda aldrei snjór eða hálka í jarðgöngum.

1000 hvítar veifur á björkum í vegstæði Vegagerðarinnar í Teigsskógi
"Þúsund hvítar veifur á björkum í Teigsskógi eru ákall um að stjórnvöld láti fornskóginn þar í friði. Fyrirhuguð er hraðbraut í gegnum skóginn og þvera á firði á sunnanverðum Vestfjörðum. Vegagerðin er alvarlegt umhverfisslys þar sem þessi mjög svo umdeildi vegur spillir lítt snortinni landslagsheild, þar með töldum hinum forna Teigsskógi, og þverun fjarða mun hafa áhrif á leirur og fæðustöðvar hundruða þúsunda farfugla sem hafa leirurnar sem áningarstað auk varpfuglanna á svæðinu. Öll þessi röskun er óþörf þar sem gamla vegastæðið og göng gegnum hálsa er ódýrari, öruggari og jafnfljótleg leið - og spillir engu. Jónína Bjartmarz fyrrverandi umhverfisráðherra felldi úrskurð Skipulagsstofnunar úr gildi og heimilaði þessa vafasömu framkvæmd.

Íslendingar eiga að fara vel með landið sitt og varðveita forna skóga og leirur, fugla og fagurt landslag. Veifurnar í Teigsskógi eru ákall um betri umgengni við landið." 

Náttúra - Tónleikar Bjarkar og Sigur Rósar

- til stuðnings náttúruvernd á Íslandi

Björk Guðmundsdóttir og Sigur Rós ásamt Ólöfu Arnalds halda tónleika til stuðnings náttúruvernd á Íslandi í brekkunni fyrir ofan þvottalaugarnar í Laugardal í Reykjavík kl. 17 28.júní nk. 

Aðgangur að tónleikunum verður ókeypis og gefa þeir aðilar sem að tónleikunum standa alla sína vinnu. Til þess að allt heppnist sem best óska tónleikahaldarar eftir sjálfboðaliðum til starfa á tónleikunum og eru áhugasamir beðnir að hafa samband við Margréti Vilhjálmsdóttur í síma 8483891 eða Diljá í netfangi: [e-mail]
Eins er óskað eftir góðum og nytsömum tillögum í tengslum við uppákomuna.

Fjölskyldugarðurinn og Sundlaugin í Laugardal verða opin fyrir tónleikagesti til 24.00 þetta kvöld.

Tónleikahaldarar treysta því að umhverfisvænir tónleikagestir sýni vistvernd í verki og gangi vel um svæðið. Annars sér Reykjavíkurborg um tiltekt á svæðinu eftir tónleikana og Gámafélagið ehf. um endurvinnslu á því rusli sem til fellur endurgjaldslaust.

Aðstandendur tónleikanna bjóða öllum Náttúruverndarsamtökum að kynna sína starfsemi í stórum tjöldum á tónleikasvæðinu.
Búið er að kolefnisjafna tónleikana og buðust bændur á Þjórsársvæðinu og Sól á Suðurlandi til að gróðursetja 1001 björk. Björkunum var plantað nálægt Þjórsá í landi Skaftholts og hefur garðurinn fengið nafnið Sigur Rósarlundur.   

Nánari upplýsingar á: www.nattura.info
Eins: www.bjork.com  og www.sigurros.com

Farið um Hellisheiði, Hverahlíð og Ölkelduháls

Græna netið stendur fyrir skoðunarferð um Hellisheiði, Hverahlíð og Ölkelduháls sunnudaginn 8. júní 2008. Lagt verður af stað frá BSÍ kl. 11 undir leiðsögn Sigmundar Einarssonar jarðfræðings og Jakobs Gunnarssonar umhverfisfræðings.

Ferðaáætlunin er á þennan veg:

• Lagt af stað frá BSÍ kl. 11. 
• Á leiðinni austur verður farið yfir hversu mörg jarðhitaverkefni hafi fengið e.k. málsmeðferð hjá Skipulagsstofnun og hve oft tilkynningaskyld verkefni hafi verið ákvörðuð háð mati og hversu oft Skipulagsstofnun hafi lagst gegn verkefnum að hluta eða í heild af þeim sem hafa farið í gegnum mat á umhverfisáhrifum.
• Fyrsti áfangastaður er við Hellisheiðarvirkjun. Ekki stendur til að fara inn í virkjunina en stefnt að því að ganga upp í hlíðar fyrir ofan virkjunina og glöggva okkur á umfangi þess svæðis sem búið er að virkja. 
• Þá verður farið að Hverahlíð. Á því svæði má sjá hvernig jarðhitasvæði lítur út þegar rannsóknarboranir eru hafnar en virkjun hefur ekki verið reist. Hafa ber í huga að Orkuveita Reykjavíkur boðar nýja kynslóð jarðhitavirkjana á þessu svæði og hefur lýst því yfir að sjónræn áhrif mannvirkja verði í algjöru lágmarki. 
•  Loks verður farið á Ölkelduháls. Skoðum hverasvæðin sem eru skammt frá bílaplaninu og röltum niður í Reykjadal og upp aftur. Fræðumst um jarðskjálfta, jarðhita og tignarlegt landslag. 
• Komið til Reykjavíkur milli kl. 4 og 5. 
  
  Athygli er vakin á því að við Hverahlíð og Ölkelduháls má sjá áhrif jarðskjálftanna frá í síðustu viku, og við skoðum svæðin meðal annars með það fyrir augum að greina sýnileg ummerki jarðskjálftanna. Okkur ber að sýna sérstaka aðgát á hverasvæðunum við Ölkelduháls eftir skjálftana.
  
  Leiðsögumennirnir Sigmundur Einarsson og Jakob Gunnarsson þekkja svæðið vel. Sigmundur starfar á Náttúrufræðistofnun Íslands og fæst þar m.a. við rammaáætlun um vernd og nýtingu náttúrusvæða. Hann skrifaði fyrir nokkrum árum lærða grein um aldur hraunanna á Hellisheiði. Jakob er sá sérfræðingur á Skipulagsstofnun sem komið hefur að flestum jarðhitaverkefnum á Hellisheiði.

Kostnaður fyrir hvern fullorðinn er 1500 krónur.

Þátttaka tilkynnist hið allra fyrsta á netfangið [e-mail] eða [e-mail].

 

Stjórnin

Ingibjörg Sólrún um umhverfismálin

Formaður Samfylkingarinnar ræðir um umhverfisstefnuna á aðalfundi Græna netsins á Sólon á laugardaginn 24. maí

Ingibjörg Sólrún Gísladóttir utanríkisráðherra og formaður Samfylkingarinnar ræðir um umhverfisstefnu flokks og lands á fundi Græna netsins á Sólon á laugardaginn. Fundurinn hefst kl. 11.30, eftir aðalfund samtakanna sem hefst kl. 11. Þau Mörður Árnason, formaður Græna netsins, Lára Ómarsdóttir blaðamaður og Árni Finnsson, formaður Náttúruverndarsamtaka Íslands, ræða fyrst stuttlega um stöðu umhverfismála og stefnu Samfylkingarinnar en síðan hefur Ingibjörg Sólrún orðið og svarar fyrirspurnum fundarmanna.

Allir áhugamenn um umhverfismál eru velkomnir á fundinn. – Græna netið var stofnað í október í fyrra, „félag jafnaðarmanna um náttúruna, umhverfið og framtíðina,“ sjálfstæður félagsskapur í tengslum við Samfylkinguna, og hefur fyrsta starfsár sitt haldið fundi um umhverfismál, farið í vettvangsferðir á svæði sem um er deilt, gefið álit á einstökum framkvæmdum og samþykkt ályktanir um það sem efst er á baugi í umhverfisstjórnmálum.

Aðalfundur Græna netsins 24. maí

Aðalfundur Græna netsins verður haldinn laugardaginn 24. maí á kaffistofunni Glætunni, Aðalstræti 9, kjallara, og hefst kl. 11 árdegis.

Auk aðalfundarstarfa verða pallborðsumræður með þátttöku fundarmanna um stöðu umhverfismála, umhverfisstefnu Samfylkingarinnar og útlitið framundan.

Allir áhugamenn velkomnir.

 --------------

Vettvangsferð um Hellisheiði

Græna netið ætlar í vettvangsferð um virkjana- og útivistarsvæði á Hellisheiði og nágrenni laugardaginn 7. júní. Ferðin hefst um kl. 10 á Umferðarmiðstöðinni og verður þátttökugjaldi stillt í hóf. Reiknað með nokkurri göngu og útivist eftir veðri og aðstæðum, áætluð koma aftur í bæinn 15-16. Tilkynnið þátttöku í [e-mail].
-- nánari ferðalýsing síðar.