Græna netið skundar á Þingvöll

- Þingvellir, Lyngdalsheiði og Gjábakki
 
Sunnudaginn 4. maí ætlar Græna netið að skunda á Þingvöll m.a. í þeim tilgangi að kynna sér deilur um legu Gjábakkavegar sem liggur á milli Þingvalla og Laugarvatns.  Einar Sæmundsson, fræðslufulltrúi þjóðgarðsins, fer með okkur um svæðið og  ræðir um stöðu náttúruverndar á Íslandi.
Lagt verður af stað kl.11 frá BSÍ og er ráðgert að koma til baka um kl. 17. Ferðalangar þurfa að hafa með sér nesti og drykkjarföng þar sem við getum ekki treyst því að þjónustumiðstöðin verði opin.

Allir eru velkomnir en tilkynna þarf þátttöku með tölvupósti í netfangið [e-mail] eða [e-mail].  Einnig er hægt að tilkynna sig með sms eða símtali í 861 2135.  Góðfúslega látið vita af fjölda samferðamanna þegar tilkynnt er um þátttöku.

Fargjald er krónur 1.500 og frítt fyrir börn yngri en 12 ára.

Á vef Veðurstofunnar fyrir sunnudaginn segir:
Hiti: 12°C
Vindur: austan 5 m/s (andvari eða gola)
En býst við einhverri úrkomu um allt land.

Þátttakendur þurfa því að búa sig með hliðsjón af því að það geti fallið skúrir.  Við gerum ráð fyrir útivist sem á að vera fær öllu fullfrísku fólki.
Hægt er að kynna sér tillögur að legu Gjábakkavegar á vef Landverndar en þar fer fram netkosning um tillögurnar.

Össur um orku og umhverfisvernd

Iðnaðarráðherra gestur á spjallfundi Græna netsins á laugardag

Össur Skarphéðinsson iðnaðarráðherra er gestur Græna netsins á fundi laugardaginn 26. apríl um frumvarpið um framtíð orkumála, um iðnaðaruppbyggingu, stóriðjuáform og náttúruvernd.  Fundurinn verður haldinn á Sólon í Bankastræti, Reykjavík, og hefst klukkan 11. Eftir stutt upphafsávarp Össuarar verða umræður og fyrirspurnir.

Þetta er fyrsti opni fundurinn sem iðnaðarráðherra heldur í höfuðborginni í vetur og má vænta fjörugra og fróðlegra umræðna á fundi Græna netsins með Össuri Skarphéðinssyni. Fundarstjóri verður Katrín Theodórsdóttir lögmaður. 

Félagar í Græna netinu eindregið hvattir til að mæta á þennan fund með einum mikilvægasta stjórnmálamanni flokks og þjóðar á umhverfissviði!

 

Stjórnin

Bíðum niðurstöðu rammaáætlunar - yfirlýsing Samfylkingarinnar

Eftirfarandi yfirlýsing var samþykkt í lok flokksstjórnarfundar Samfylkingarinnar sl. sunnudag: „Flokksstjórnarfundur Samfylkingarinnar á Hótel Sögu 30. mars 2008 hvetur ríkisstjórnina til að vinna að atvinnuuppbyggingu sem byggist á þekkingu, hátækni og virðingu við sjónarmið náttúru- og umhverfisverndar. Fundurinn leggur áherslu á að meðan beðið er niðurstöðu rammaáætlunar um vernd og nýtingu náttúrusvæða verði ekki farið inn á óröskuð svæði og varar eindregið við því að virkjana- og stóriðjuframkvæmdir hefjist áður en gengið hefur verið frá orkuöflun, línulögnum, losunarheimildum o.fl.

Flokksstjórnarfundurinn telur að við ákvörðun um meiriháttar framkvæmdir í atvinnumálum með tilstuðlan og atbeina stjórnvalda og almannafyrirtækja verði að taka mið af nútímalegum atvinnuháttum, byggðasjónarmiðum og umhverfisþáttum, þar á meðal skuldbindingum Íslendinga í loftslagsmálum og fyrirheitum um vernd ósnortinna náttúrusvæða.“

Ályktunartillöguna báru fram þau Anna Pála Sverrisdóttir, formaður UJ, og Mörður Árnason, formaður Græna netsins, fyrir hönd samtaka sinna og var hún samþykkt með breytingartillögu frá Ingibjörgu Sólrúnu Gísladóttur. Í umræðum um tillöguna var sérstaklega minnst á boðaðar Helguvíkurframkvæmdir og virkjanir og línulagnir sem þeim tengjast.

Græna netið lýsir yfir stuðningi við umhverfisráðherra vegna Helguvíkur

Stjórn Græna netsins, samtaka umhverfisverndarsinna í tengslum við Samfylkinguna lýsir fullum stuðningi við Þórunni Sveinbjarnardóttur umhverfisráðherra og mótmælir samþykktum um að leyfa framkvæmdir í Helguvík í ályktun sem samþykkt var á stjórnarfundi í hádeginu í dag, 13. mars 2008:

„Stjórn Græna netsins tekur undir ummæli Þórunnar Sveinbjarnardóttur umhverfisráðherra um fyrirhugaðar framkvæmdir í Helguvík og lýsir fullum stuðningi við ráðherrann í þessu máli. Stjórn Græna netsins mótmælir harðlega ákvörðunum tveggja sveitarstjórna um að leyfa framkvæmdir í Helguvík. Ekki hefur verið tryggð orka til álversins og er meira að segja alls óljóst um orkuöflun til fyrri eða fyrsta áfanga þess. Ýmsar þeirra virkjana sem til þess voru ætlaðar eru enn á teikniborðinu, aðrar ekki komnar gegnum umhverfismat og ekki líklegt að af þeim verði, t.d. virkjuninni á Ölkelduhálsi eða Bitru. Mikil óvissa er um flutningslínur að Helguvík og álfyrirtækið hefur ekki aflað sér losunarkvóta. Þá hefur umhverfisráðherra hefur enn ekki úrskurðað um kæru Landverndar um umhverfismat álversframkvæmdanna í heild.

Við þessar aðstæður eru yfirlýsingar forráðamannanna og samþykktirnar í sveitarstjórnum Reykjanesbæjar og Garðs fyrst og fremst áróðursbragð til að afla málinu fylgis í miðjum tíðindum um kólnun í efnahagslífi og alþjóðlega fjármálaerfiðleika. Staðreyndin er sú að álver í Helguvík hefur neikvæð áhrif gagnvart þeim úrlausnarefnum sem nú blasa við í efnahagsmálum og álversframkvæmdir þar mundu síst draga úr vanda byggðanna kringum landið. Framkvæmdir munu án vafa seinka vaxtalækkunarferli Seðlabankans og lækkun verðbólgu með gríðarlegum kostnaði fyrir heimilin í landinu.
Álver eru ekki svarið í atvinnuuppbyggingu næstu áratuga en sumar þeirra virkjanaframkvæmda sem framkvæmdirnar byggjast á eru hinsvegar hrein umhverfisslys.

Stjórnvöld eiga að hindra álversáform í Helguvík og beita áhrifum sínum til þess að sú orka sem í boði er á svæðinu sé nýtt til nútímalegri og umhverfisvænni iðnaðar.“

Olíuhreinsistöð – nútímakukl á Vestfjörðum?

Halldór Halldórsson bæjarstjóri á Ísafirði, Dofri Hermannsson varaborgarfulltrúi og  Bergur Sigurðsson framkvæmdastjóri Landverndar eru málshefjendur á spjallfundi Græna netsins laugardagsmorguninn 1. mars um Olíuhreinsistöð – nútímakukl á Vestfjörðum?

 

Eftir fundi fyrir vestan um síðustu helgi og tillögur Framtíðarlandsins um atvinnuuppbyggingu á Vestfjörðum eru áformin um olíuhreinsistöð á Vestfjörðum í brennidepli. Dofri hefur skrifað um áformin hvassar greinar sem hafa vakið ýmis viðbrögð vestra, Halldór er svæðinu öllu kunnugur sem bæjarstjóri, er höfundur hugmyndanna um „stóriðjulausa Vestfirði“ en í seinni tíð hallur undir stöðvaráformin, og Bergur er nýkominn úr leiðangri til Noregs þar sem hann og Ómar Ragnarsson skoðuðu olíuhreinsistöðvar og nærleiggjka ndi byggðir.

 

Það má búast við góðum erindum og  fjörugum umræðum á fundi Græna netsins á laugardaginn – hann verður haldinn á veitingahúsinu Sólon í Bankastrætinu, efri hæð, og hefst kl. 11 árdegis. Allir velkomnir.

  

Enginn er verri þótt hann vökni

Góð mæting var í vettvangsferð Græna netsins á Varmársvæðið í Mosfellsbæ á laugardag þrátt fyrir úrhellisrigningu. Tilgangur ferðarinnar var að fræðast um jarðhitasvæðið  í Reykjahverfi, skoða náttúruperlur á bökkum Varmár og líta yfir framkvæmdasvæðið í Helgafellslandi. Magnús Guðmundsson sagnfræðingur leiddi hópinn sem hóf för í  Reykjahverfi þar sem Guðmundur Jónsson sagði sögu kalkúnaræktar á Reykjabúinu. Eftir skemmtilega göngu upp í hlíðar Reykjafjalls undir leiðsögn Magnúsar var haldið til Hönnu Bjartmars en þar biðu hópsins ylur og indælar veitingar. Jónas Sigurðsson bæjarfulltrúi sagði þar gestum frá stöðu skipulagsmála í Mosfellsbæ áður en haldið var af stað að Reykjalundi þar sem Magnús skýrði frá sögu staðarins. Þaðan var haldið að fögru gljúfri Skammadalslækjar og niður að Álafossi.
Í Álafosskvos beið Palli hnífasmiður eftir göngugörpum með ilmandi fiskisúpu. Undir borðum sagði Katrín Theódórsdóttir lögmaður frá Varmárdeilunni og fulltrúar Varmársamtakanna frá starfi samtakanna og markmiðum. Dagskránni lauk síðan með stuttri heimildamynd um lífið á Álafossi frá 1896-1970 sem Hildur Margrétardóttir og fleiri íbúar á svæðinu eru að vinna að.
Græna netið átti frumkvæði af þessari vel heppnuðu ferð í Mosfellsbæ sem þeirra fólk á svæðinu skipulagði og er vonandi að starf félagsins haldi áfram með sama dampi og hér er lýst.

Þjóðin stendur með Þjórsá - baráttufundur

Náttúruvernd í þéttbýli – vettvangsferð í Mosfellsbæ

Laugardaginn 16. febrúar verður farið undir merkjum Græna netsins á Varmársvæðið í Mosfellsbæ. Safnast saman kl. 11 frá endastöð strætó við Reykjaveg. Gengið um hverasvæðið í Reykjahverfi og upp í hlíðar Reykjafells ef veður leyfir undir leiðsögn Magnúsar Guðmundssonar sagnfræðings. Eftir gönguna þiggur hópurinn hressingu í bústað Hönnu Bjartmars bæjarfulltrúa á bökkum Varmár. Þar verður skipulagsspjall Jónasar Sigurðssonar oddvita Samfylkingarinnar í bænum og þeir Sigurður Ásbjörnsson og Magnús Guðmundsson skýra út jarðfræðina. Gengið niður að dælustöð Orkuveitunnar og gegnum Reykjalundarskóg að gljúfri Skammadalslækjar og síðan í Álafosskvos þar sem Palli hnífasmiður býður fiskisúpu og Katrín lögmaður Theódórsdóttir talar um Varmárdeiluna. Heimsókninni lýkur um 15.30 hjá Hildi Margrétardóttur myndlistarmanni sem sýnir okkur glefsur úr kvikmynd um lífið á Álafossi fyrr á tímum.

Til að tryggja að allir fái örugglega sinn skammt af indælli fiskisúpu Palla hnífasmiðs biðjum við göngugarpa að skrá þátttöku hjá [e-mail]

 Þetta verður mögnuð vettvangsferð – takið daginn frá og látið fiskisöguna fljúga. Reykvíkingar eru hvattir til að fara til Mosó á vistvænan hátt, með leið 15, sem fer frá Meistaravöllum kl. 10.04.

Hanna Bjartmars býr í Reykjaseli við Engjaveg Skammadalsmegin við Varmá á móts við Reykjabyggð. Bílastæði eru í grennd við endastöðina.

Stjórnin

Auður miðbæjarins - fundur um borgarskipulag

- Græna netið fundar um skipulag, gömul hús og fagurt mannlíf í miðbæ Reykjavíkur
Þeir Jóhannes Kjarval arkitekt hjá Borgarskipulagi og Stefán Benediktsson fulltrúi  Samfylkingarinnar í skipulagsnefnd Reykjavíkurborgar eru málshefjendur á spjallfundi Græna netsins nk. laugardagsmorgun um Auð miðbæjarins – skipulag í miðbæ Reykjavíkur, gömul hús og ný, mannlíf, verslun, umferð og íbúabyggð.
Fundurinn er haldinn á Sólon í Bankastrætinu og hefst kl. 11 árdegis.
Mætið vel á  áhugaverðan fund þar sem fagmenn fjalla um miðbæjarmálin og kveikja umræður um merkileg efni sem eru ofarlega á baugi þessar vikur.

Skrár tengdar þessari bloggfærslu:

• Viðtal um miðbæjarskipulag v Margréti Harðardóttur arkitekt

Ný samtök umhverfis- og náttúruverndarfólks

Nokkrir áhugamenn innan Samfylkingarinnar stofnuðu 13. október sl. nýtt félag umhverfis- og náttúruverndarfólks. Vinnuheiti félagsins er Græna netið – félag jafnaðarmanna um náttúruna, umhverfið og framtíðina.
Stofnfundur var haldinn á Kaffi Hljómalind og var Björg Eva Erlendsdóttir blaðamaður, sem í sumar beitti sér gegn fyrirhuguðum miðlunarvirkjunum í neðrihluta Þjórsár, sérstakur gestur fundarins.

Nýja félaginu er ætlað að vera vettvangur umræðna, upplýsinga og stefnumótunar í þessum efnum, tengja saman jafnaðarmenn, flokksbundna sem óflokksbundna, sem hafa áhuga og þekkingu á umhverfismálum og náttúruvernd, og veita forystumönnum flokksins í þeim málaflokkum samráð, hvatningu og aðhald. – Félagið hefur ekki beina aðild að Samfylkingunni en starfar í námunda við flokkinn svipað og t.d. félagsskapur jafnaðarmanna í atvinnurekstri.

Í stjórn Græna netsins voru kosin þau Dofri Hermannsson, Helga Rakel Guðrúnardóttir, Katrín Theodórsdóttir, Mörður Árnason og Sigurður Ásbjörnsson. Varamenn eru þær Ragnhildur Sigurðardóttir og Sigrún Pálsdóttir sem jafnframt mun hafa  umsjón með bloggi félagsins.