Hvað eftir Kyoto?

Árni Finnsson og Þórunn Sveinbjarnardóttir ræða um loftslagsvána, Kaupmannahafnarráðstefnuna í desember og aðgerðir á Íslandi á opnum fundi Græna netsins og SffR á miðvikudagskvöld

Þau Árni Finnsson formaður Náttúruverndarsamtaka Íslands og Þórunn Sveinbjarnardóttir alþingismaður og fyrrverandi umhverfisráðherra eru málshefjendur á sameiginlegum fundi Græna netsins og Samfylkingarfélagsins um loftslagsmálin á miðvikudagskvöldið, 25. nóvember. Fundarstjóri er Mörður Árnason, formaður Græna netsins. Fundurinn verður haldinn í húsum SffR á Hallveigarstíg 1, 2. hæð, hefst kl. 20.30 og lýkur um kl. 22.

Loftslagsráðstefnan í Kaupmannahöfn hefst eftir rúmar þrjár vikur. Hún er sú síðasta undir merkjum Kyoto-samkomulagsins sem nær til ársloka 2012, og nú á að ná nýju samkomulagi um næsta tímabil. Miklar væntingar eru gerðar til ráðstefnunnar um raunverulegan árangur því horfur í loftslagsmálum versna sífellt, og margir fremstu fræðimenn og umhverfisstjórnmálamenn telja að það ráðist á næsta áratug hvort okkur sem nú lifum tekst að stemma stigu við ógninni.

Íslendingar hafa einnig hlutverki að gegna, sem þjóð meðal þjóða við sameiginlegar ákvarðanir, og einnig við að sinna skuldbindingum okkar og takast á hendur auknar skyldur – sem hérlendis falla saman við uppbygginguna eftir hrunið.

Um þessi mál ræða þau Árni og Þórunn á miðvikudagskvöld, en bæði ætla þau til Hafnar í næsta mánuði að fylgjast með ráðstefnunni.
Fróðlegur og skemmtilegur fundur í vændum, allir velkomnir á Hallveigarstíginn miðvikudag frá 20.30.

Stjórn Græna netsins

Athugasemdir

[Sigurður Grétar Guðmundsson, 24.11.2009 kl. 21:01]

Ég ætla að krefja ykkur í Græna netinu um að sýna mér og sanna að það hafi einhversstaðar verið vísindalega sannað að koltvísýringur CO2 hafi áhrif svo nokkru nemi á loftslag í heiminum. Það er kominn tími til að þið og aðrir sem fylgið blint því sem frá IPCC kemur leggið fram gögn sem sanna þetta.

Ætlið þið að stinga höfðinu í sandinn þegar nú hefur komið í ljós stórfellt misferli með vísindaleg gögn hjá Hadley í Englandi, nóg var fölsun Michael Mann á loftslagi síðustu 1000 ár þegar hann setti fram hinn alræmda Hokkýstaf.